ಹೊಸದಿಲ್ಲಿ: ಭಾರತದ ಎರಡನೇ ದೊಡ್ಡ ಶ್ರೀಮಂತ ಮುಕೇಶ್ ಅಂಬಾನಿ ದುಬೈನ ಕಡಲ ಕಿನಾರೆ ಪಕ್ಕದಲ್ಲಿ ಮತ್ತೊಂದು ವಿಲ್ಲಾ ಖರೀದಿಸಿದ್ದು, ಇದರೊಂದಿಗೆ ತಮ್ಮ ಯುಎಇ ಆಸ್ತಿ ಸಾಮ್ರಾಜ್ಯವನ್ನು ವಿಸ್ತರಿಸಿದ್ದಾರೆ. ದುಬೈನ ಪಾಮ್ ಜುಮೈರಾ ಕೃತಕ ದ್ವೀಪದಲ್ಲಿ ಈ ವಿಲ್ಲಾ ಇದ್ದು, ಇದರ ಖರೀದಿಗೆ ರಿಲಯನ್ಸ್ ಇಂಡಸ್ಟ್ರೀಸ್ ಲಿ.ನ ಮುಖ್ಯಸ್ಥ ಅಂಬಾನಿ 163 ಮಿಲಯನ್ ಡಾಲರ್ ಹಣ ಪಾವತಿಸಿದ್ದಾರೆ. ಭಾರತೀಯ ರೂಪಾಯಿ ಲೆಕ್ಕದಲ್ಲಿ ಇದರ ಬೆಲೆ 1,351 ಕೋಟಿ ರೂ. ಆಗುತ್ತದೆ ಎಂದು ಮೂಲಗಳನ್ನು ಉಲ್ಲೇಖಿಸಿ ಆಂಗ್ಲ ಮಾಧ್ಯಮಗಳು ವರದಿ ಮಾಡಿವೆ.
ದುಬೈನ ತಾಳೆ ಮರದ ಆಕಾರದಲ್ಲಿರುವ ಇದೇ ಪಾಮ್ ಜುಮೈರಾ ದ್ವೀಪದಲ್ಲಿ ಈ ವರ್ಷವೇ ಕಿರಿಯ ಮಗ ಅನಂತ್ ಅಂಬಾನಿಗಾಗಿ 80 ಮಿಲಿಯನ್ ಡಾಲರ್ (ಸುಮಾರು 664 ಕೋಟಿ ರೂ.) ನೀಡಿ ಮುಕೇಶ್ ಅಂಬಾನಿ ಐಷಾರಾಮಿ ಮನೆಯೊಂದನ್ನು ಖರೀದಿಸಿದ್ದರು. ಇದು ಕೂಡ ನಗರದ ಅತಿದೊಡ್ಡ ವಸತಿ ಮಾರಾಟ ವಹಿವಾಟುಗಳಲ್ಲಿ ಒಂದಾಗಿತ್ತು. ಬಿಲಿಯನೇರ್ ಉದ್ಯಮಿ ವಿದೇಶದಲ್ಲಿ ಆಸ್ತಿಗಳ ಖರೀದಿಗಾಗಿ ಹುಡುಕಾಟ ಮುಂದುವರಿಸಿದ್ದು, ಪಾಶ್ವಿಮಾತ್ಯ ದೇಶಗಳಲ್ಲಿ ಇನ್ನೊಂದು ಮನೆ ಖರೀದಿಸಲು ನೋಡುತ್ತಿದ್ದಾರೆ.
ಯುಎಇ ಎಂದು ಸಂಕ್ಷಿಪ್ತವಾಗಿ ಕರೆಯಲ್ಪಡುವ ಯುನೈಟೆಡ್ ಅರಬ್ ಎಮಿರೇಟ್ಸ್ನ ಜನಸಂಖ್ಯೆಯಲ್ಲಿ ಶೇ. 80ಕ್ಕಿಂತ ಹೆಚ್ಚಿನ ಮಂದಿ ವಿದೇಶೀ ನಿವಾಸಿಗಳೇ ಆಗಿದ್ದಾರೆ. ಅವರು ದಶಕಗಳಿಂದ ಇಲ್ಲಿನ ಆರ್ಥಿಕತೆಯ ಮುಖ್ಯ ಆಧಾರವಾಗಿದ್ದು, ಭಾರತೀಯರು ‘ಅನಿವಾಸಿಗಳು’ ದುಬೈ ರಿಯಲ್ ಎಸ್ಟೇಟ್ನ ಉನ್ನತ ಖರೀದಿದಾರರಲ್ಲಿ ಪ್ರಮುಖ ಸ್ಥಾನದಲಿದ್ದಾರೆ. ಕೊರೊನಾ ಅಬ್ಬರ ಕಡಿಮೆಯಾಗುತ್ತಿದ್ದಂತೆ ಇಲ್ಲಿನ ಪ್ರಮುಖ ಭಾಗಗಳಲ್ಲಿನ ಆಸ್ತಿ ಬೆಲೆಗಳು ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಶೇ. 70ಕ್ಕಿಂತ ಹೆಚ್ಚು ಏರಿಕೆ ಕಂಡಿವೆ
